Cruceiro de Canido (Ferrol)

Os peregrinos que inician a ruta xacobea en Ferrol cara a Santiago poden ver na praza de Canido unha obra vistosa e de bo porte, con imaxes de calidade e boa labra de Cristo e a Virxe da Piedade. A efixie de Cristo, de formas tradicionais, aparece coroada de espiñas baixo unha cartela de INRI, as mans abertas e os pés cravados xuntos. A Virxe da Piedade amosa o Fillo no seu colo nunha típica composición romboidal.

Obra do ano 1938, leva un varal de sección octogonal e un capitel decorado con volutas esquinais e flores de catro pétalos no ábaco. Trátase do quinto exemplar erixido na praza desde época medieval, o que amosa a persistencia no tempo dun tradicional cruceiro nun lugar onde se continúa a celebrar a festa relixiosa da Exaltación da Santa Cruz o día 3 de maio; o cruceiro adórnase con numerosos motivos florais como tradicional celebración dos Maios, festas agrarias e estacionais que saúdan a chegada da primavera.