Santiago: Parlamento de Galicia

Neste cuartel fixo Ricardo antes da guerra o servizo militar no corpo de artillaría montada. Viviu moitos dos episodios históricos relacionados co noso Estatuto do 36 sendo coautor con Luis Tobío do “Anteproyeito de Estatuto da Galiza que presentou a poñenza”, recuperado en La fuerza pública en la Universidad de Santiago y otros escritos escolares (1930-1933) en 1987. O Parlamento que o declara Fillo Ilustre de Galiza acolle a súa biblioteca desde 1997 e fixo posíbel a aparición dos Estudos dedicados a Ricardo Carvalho Calero (2000), en dous volumes editados polo profesor José Luís Rodríguez.

O 27 de xuño de 1986 participa con Bibiano Fernández Osorio-Tafall na celebración do 50 aniversario do Estatuto de 1936 co discurso na USC “Comemoraçom do Estatuto Galego de 1936” do que ofrecemos unha mostra.

“Os nacionalistas pleiteavam co Estado, situavam-se numha postura dialéctica exterior ao Estado. Os federais situavam-se numha posiçom dialéctica interior ao Estado, cuja forma queriam melhorar. O nacionalismo nom era umha forma de republicanismo. O federalismo nom era umha forma de nacionalismo (…) Uns e outros olhavam-se como estranhos, cando nom como adversários.

Mas estes republicanos vagamente federais e estes galeguistas vagamente republicanos forom arrastados a um entendimento mais ou menos profundo pola força das circunstancias. De jeito que uns e outros pareciamos luitar conjuntamente pola República Federal.

Assi, cando, advido o novo regime, Tobio e mais eu nos pugemos a trabalhar na biblioteca da Faculdade de Direito na redacçom de um anteprojecto de Estatuto de Galiza, comezamo-lo com esta declaraçom: «Galiza é um Estado livre dentro da República Federal Espanhola». Dávamos, pois, por descontado, nom já que a República ia ser federal, mas que a República era federal, e que a ordenaçom constitucional encomendada a umhas Cortes ainda nom reunidas, nom ia alterar esse feito, senom articular, regulamentar esse feito, que, como a forma republicana de governo, era um postulado estabelecido pola revoluçom pacífica o 14 de abril triunfante.

Mas a República nom foi federal, e o nosso Estatuto, que, como alguns diziam, impunha ao Estado umha forma que só o Estado podia dar-se, resultou inviável, e foi preciso ajeitar-se aos limites do Estado que os constituintes estabelecerom.

Este Anteprojecto foi apresentado à Assembleia que se celebrou no Paraninfo ou Salom de Actos da Faculdade de Medicina os dias 17, 18 e 19 de decembro, à que eu assistim com umha credencial de técnico. Esta Assembleia foi especialmente memorável polos debates, tumultos e retiradas a que derom motivo dous conflitivos pontos do texto preparado. Eram o ponto relativo à capitalidade e o relativo à língua oficial.

Daquela Assembleia saiu o projecto de Estatuto que havia ser plebiscitado, projecto aprovado maioritariamente. Só despois do triunfo da Frente Popular nos comícios de fevereiro de 1936, foi possível ressuscitar a ideia do plebiscito.

“Comemoraçom do Estatuto Galego de 1936”, discurso no Paraninfo da Universidade de Santiago de Compostela pronunciado o 27 de xuño de 1986. Publicado en Agália nº 8, 417-421 (1986) e no libro Do galego e da Galiza, 141-147 (Santiago: Sotelo Blanco), 1990.