Lugo: Igrexa de Santiago a Nova

Lugo é unha cidade moi querida para Ricardo. A cidade da súa familia política e da familia que formou con María. Ademais dos quince anos que dirixiu Fingoi pasou moito tempo en Lugo, mesmo despois de xubilado. Alí escribiu títulos moi relevantes da súa bibliografía. O 9 de outubro de 1933 é unha data sinalada na súa vida. A María e a Ricardo cásaos na igrexa de Santiago en Lugo don Federico Somoza, abade de San Pedro de Esperela, a terra natal da noiva. A festa posterior ao casamento celebrouse no Hotel Méndez Núñez. Aquí declárase lugués.

 “Contodo, nom só, sem míngua da minha calidade nativa de marinhám, devo considerar-me luguês por razom de longa vizinhança, mas porque os meus filhos e os meus netos levam sangue luguês, pois luguês é o sangue da nai daqueles e avoa destes, e porque a metade dos meus filhos e a totalidade dos meus netos fôrom nados em Lugo, e em Lugo vive hoje (fala en 1974) toda a minha descendência.

Umha parte do meu bacharelato foi realizado no Instituto Geral Técnico de Lugo; ou, para ser mais exacto, sofrim exame de diversas matérias, como aluno livre, naquel Centro, do cal os locais estavam situados no edifício da Deputaçom Provincial, na rua de Sam Marcos. Em Lugo casei, na igreja de Santiago da Nova, e o crego que abençoou aquela uniom, dom Federico Somoça, era abade de San Pedro de Esperela, parróquia em que a noiva nacera. Residente, polos azares da vida, em distintos lugares, na minha mocidade e na minha maturidade, sempre mantivem relaçom estreita com a cidade de Lugo, aginha emparentado com gentes daquelas terras.

“Quinze anos em Lugo", 113-121, Letras galegas (A Coruña: AGAL), 1984. Conferencia no Centro Lucense de Buenos Aires pronunciada o 25 de xullo de 1974.