Lugo: Hotel Méndez Núñez

Nos anos lugueses de Carvalho editou a novela A xente da Barreira, os poemarios Anxo de terra,  Poemas pendurados de un cabelo (na Colección Xistral publicada en Lugo) e Salterio de Fingoy; tamén os relatos “Os tumbos”, “As pitas baixo a chuvia” e “A cigoña” e as pezas teatrais “Farsa das zocas” ou “A arbre”.

No Hotel hospedáranse os participantes da Asemblea Nacionalista de 1918 (desenvolvida no Cine Lugo Salón), celebrouse a cea e festa de clausura. Logo de estar situado no Cantón Bar, aquí estivo a sede dun faladoiro nos anos 60 e 70 que acollía a profesionais e artistas a quen lembra Ricardo no texto que seleccionamos. Noutro momento o faladoiro viaxou á cafetaría Madrid.

 “Cando em 1950 passei a viver em Lugo, primeiro em Sam Roque, logo no Bom Jesus, depois em Fingoi, ainda a cidade conservava parte do seu enlevo de pequena capital de província. Ainda a gene passeava sistematicamente no Cantom, na Alameda, na rua da Raínha. A tertúlia do Méndez Núnhez reunia umha brilhante representaçom da intelectualidade lucense. O poeta Luís Pimentel, cantor da sua cidade natal, escuitava entre cordial e irónico os moços escritores ou pintores que compartiam as nossas horas. Entre eles estavam Constantino Grandio, hoje artista mui cotizado em Madrid, e Manuel Fernández Teixeiro, fertilíssimo poeta. Figura destacadíssima naquela polavilada era Celestino Fernández de la Vega, espírito mui agudo, mas filósofo tam avisado e crítico que nom fixo seguir nengum outro volume ao seu magnífico Segredo do humor. Anjo Fole, escritor boémio, narrador mui estimado, possuidor de raros saberes, e, como Pimentel, figura luguesa característica, era tamém juiz distinguidíssimo naquel areópago. O esculcador da saudade, Ramom Pinheiro, home de talento tam profundo como de rija fibra moral, foi tamén fraternal contertúlio da pena. E, que home galego de letras nom passava por ali se passava por Lugo? Ali se escuitava a voz de Ramom Cabanilhas que chegava de Samos, e que departia como o denso poeta Anjo Joám ou com o hábil caricaturista Mouriz que nos tem duplicado a todos com o seu lápiz. Álvaro Gil, um dos fundadores, com Pimentel, Bal e Correa Calderom, da revista Ronsel, amigo de todos os citados, nom deixava tampouco nunca de visitar a pena cando a sua saudade de luguês o traia ao recinto amuralhado. E todos temos escuitado naquelas mesas as últimas confidências de Faustino Santalices sobre a arte de tanger a sanfona.

Muitos destes paisanos e amigos, como Pimentel, Anjo Joám, Cabanilhas, Santalices nom som ja deste mundo. Deles e outros muitos, dos lentos solpores na muralha, das mestas névoas do Minho, do arrecendo  do polvo na Mosqueira, do correcans nas procissons, das eiras de gado do Sam Froilám, do domingo das moças, de figuras relevantes da vida social, como dom Francisco Vázquez Saco, dom Manuel Vázquez Seixas, dom José Trapero Pardo; do forte sabor dos invernos gelados e os frescos veraos no Parque Rosalia de Castro; dos problemas do urbanismo; das relaçons da capital com o seu entorno, de ¡tantas cousas! Teríamos podido departir, de luguês a lugueses, durante... ¡tanto tempo!”.

“Quinze anos em Lugo", 113-121, Letras galegas (A Coruña: AGAL), 1984. Conferencia no Centro Lucense de Buenos Aires pronunciada o 25 de xullo de 1974.