Cruceiro do Alto de Campolongo (Pontedeume)

No Alto de Campolongo, ao final do antigo Camiño Vello, atópase unha das cruces de pedra máis antigas da comarca do Eume. O cruceiro de Campolongo é unha obra rechamante e de gran solidez, coas súas vellas pedras luídas polo paso do tempo e dotada dunhas formas orixinais e detalles pouco correntes na comarca. Trátase dun cruceiro tradicional erixido como guía e sinal do camiño nunha típica localización de encrucillada, aínda que hoxe está colocado nun lugar pouco axeitado e mal protexido.

Catro desgastados banzos de bos perpiaños soportan un groso varal octogonal adelgazado en altura, iniciado cun dobre toro e escocia. Carece de capitel, quizais perdido nun traslado, levando unha ampla cruz grega con paus cuadrangulares e imaxes de estilo primitivo. O Cristo é de canon curto, formas expresivas e longa melena coroada de espiñas, baixo un amplo pergameo de INRI, pano co nó á esquerda e os pés apoiados na parte baixa da cruz, mentres que a Virxe da Piedade é de composición ampla, formas xeométricas e marcada presentación frontal, co Fillo colocado nunha postura forzada horizontal.