Rúa Compostela

Seguimos camiñando no medio do balbordo da actividade comercial, cando nos sorprende un nome no indicador da rúa transversal: Compostela. Curiosamente, non é pola cidade galega senón para lembrar que alí viviu o influente bispo Diego Evelino, quen adoptou o Compostela en homenaxe á súa cidade natal.

A rúa Compostela, con 21 bloques, vai de norte a sur desde Cuarteles, na Loma del Ángel, ata a avenida Carlos Manuel de Céspedes, cara ao mar. O bispo Compostela chegou a Cuba en 1687 e nos 17 anos que aquí viviu realizou un inmenso traballo de fundación de templos e conventos que se localizaron, na súa maior parte, ao longo desta rúa, como a Igrexa Parroquial del Ángel ou o convento de Santa Teresa, onde estableceu a Obra da Real Casa Cuna. Ademais, nos terreos dunha horta que doou ao cabildo, construíu un hospital de convalecentes que viría dar, no século seguinte, no primeiro colexio de Belén; tamén ordenou a construción do primeiro convento de San Isidro. No número 155 instalou a súa casa e foi enterrado nesta rúa, no convento das Teresianas, no medio dunha manifestación de dor sen precedentes na Habana da época.

Xa no século XIX, a rúa Compostela foi o escenario escollido polo escritor Cirilo Villaverde para ambientar a súa famosa novela Cecilia Valdés o la Loma del Ángel, obra canónica da literatura cubana que ata foi levada á ópera e ao cine en moitas ocasións. Na actualidade, nesta rúa atópase o Arquivo Nacional de Cuba, onde a Oficina do Historiador desenvolve un amplo programa de revitalización, dando aos edificios antigos novas funcións en favor de toda a comunidade.