Hotel Royal Palm (Estadía)
Espazo biográficoRecibidos con flores e discursos no
aeroporto, son hospedados no moderno e céntrico hotel Royal Palm, na esquina de
San Rafael e Industria, nun fermoso e ventilado cuarto con baño, co balcón á
rúa Industria, ben preto do Paseo de Martí, do Centro Galego e da sede da Casa
da Cultura, os seus anfitrións. Aquí acababa de hospedarse tamén Basilio
Álvarez, o eminente agrarista, durante a súa estadía na illa entre marzo e
outubro do mesmo ano. Apenas o tempo de deixar as cousas e marchar en autobús
ao outro cabo da illa, a un mitin xa preparado en Santiago de Cuba e una xira
de mitins e conferencias da que Castelao non regresa até o xoves 23 de
novembro.
Al llegar a la Habana he sentido una profunda emoción,
pues solamente esperaba que hubiese unos cuantos en los muelles. (Castelao, Pueblo, 11-11-1938)
O Royal Palm foi deseñado polo
arquitecto cubano Horacio Navarrete en 1926 para o influente industrial
azucreiro e construtor Luis del Valle, aínda que axiña foi adquirido polo
empresario hostaleiro leonés Pascual Morán Pérez, republicano vinculado á Casa
da Cultura. A instalación tiña nove alturas, onde se distribuían 200 cuartos
con baño privado e auga quente, mais un restaurante-miradoiro no décimo andar,
con dous modernos ascensores. O baixo comparte a recepción con tendas,
aproveitando a súa excelente localización na zona comercial.
A principios da década dos 60 o hotel
foi intervido polo Goberno revolucionario e deixou de funcionar como tal,
convertido en vivendas familiares. Co tempo e a falta de mantemento o edificio
foi deteriorándose e sufrindo descoidadas reformas estruturais e, malia que
acaba de ser restaurado coa axuda da Deputación de Sevilla, perdeu
incomprensiblemente o mosaico identificador da súa entrada.