Diario Pueblo (Visita na redacción)

Outro dos xornais que maior seguimento fixeron da aventura cubana de Castelao foi Pueblo, creado en maio de 1937 polo prestixioso xornalista catalán emigrado en Cuba de novo Lorenzo Frau Marsal. Este xornal mantiña posturas moi próximas ao Partido Comunista de Cuba, defendía o Goberno legal da República española e o bando democrático durante a II Guerra Mundial. Radicaba a redacción na Habana Vieja, en Corrales nº 102. Tiña unha periodicidade diaria, con dúas edicións, un custo de 2 centavos e unha notable tiraxe de alcance nacional.

Frau Marsal, nacido en Igualada (Barcelona) en 1886, veu de rapaz a Cuba, onde chegou a doutorarse en Dereito, aínda que dende cedo exerceu como xornalista para diferentes revistas e diarios, incluído o Diario de la Marina, o decano da prensa cubana creado polo vigués Isidoro Araújo de Lira. Tras varios anos en Madrid enviando crónicas para diferentes medios, regresa a Cuba e axiña crea o seu propio xornal, de marcada tendencia esquerdista. Casado coa filla de galegos Lucy Rodríguez García, a súa relación coa comunidade galega era moi estreita.

Grazas ao seguimento constante e profuso da viaxe de Castelao e Soto no xornal Pueblo, podemos hoxe recadar unha valiosísima información para a nosa historia. Entre esas noticias, salientamos a foto que aparece o 5 de decembro con este pé, onde se constata a visita de ambos os dous galegos á redacción do xornal:

Alfonso R. Castelao y Luis Soto, dos de las figuras principales que tomaron parte en el acto celebrado en la tarde de ayer en el Stadium de Puentes Grandes, un homenaje más a la heroica España leal, aparecen en la foto, acompañados del señor Manuel Campos, de la Casa de la Cultura y Asistencia Social, cuando visitaban la redacción de Pueblo. Los cumplimentó, nuestro director el doctor Lorenzo Frau Marsal, que también aparece en la foto. (Pueblo, 5-12-1938)