Universidad de la Habana. Anfiteatro Enrique José Varona

Pospusieron la charla de A. Castelao. Esta se celebrará mañana, a las 11 am en la Universidad Nacional. (Pueblo, 16-12-38).

En efecto, varias das actividades deben ser reaxustadas, entre elas a conferencia na Universidade, que estaba anunciada para o 16 e adiouse para o sábado 17, ás once da mañá, no recinto da Universidade. Castelao recibe a invitación do profesor de Dereito Político Juan Clemente Zamora López-Silveiro e decide presentar a conferencia “El federalismo español”. Esa mesma noite por fin se inauguran os debuxos e estampas de Castelao na Casa da Cultura.

Dous días despois, o 19 de decembro, aparece na prensa o seu nome ligado a unha extensa homenaxe no anfiteatro José Enrique Varona da Universidad de La Habana que a Unión de Escritores dedica a Pablo de la Torriente Brau (1901-1936), coñecido xornalista e escritor cubano, co gallo do segundo ano do seu pasamento na fronte de Majadahonda, mentres combatía na Guerra Civil española, onde acababa de chegar como correspondente de guerra para varios xornais americanos. Ao acto asistiron intelectuais de moito renome, como Juan Marinello, José Antonio Portuondo, Fernando de los Ríos e os galegos Luís Soto e Castelao.

A Universidad de La Habana foi fundada en 1728 como Real y Pontificia Universidad de San Gerónimo de La Habana, baixo o mando dos dominicos; en 1842 pasa ás mans civís do goberno colonial de España como Real Universidad de La Habana, nome que se transforma en Universidad Nacional cando se independiza a Illa en 1898. En maio de 1902, comeza o traslado á Loma da Pirotecnia ou Colina de Aróstegui, no barrio do Vedado, hoxe coñecida como Colina Universitaria, coa construción de novos edificios e adaptación doutros alí existentes para os seus fins académicos. Entre eles está o anfiteatro Enrique José Varona, dedicado á figura do insigne catedrático da Universidad de La Habana. Outro dos monumentos da cidade constitúeo a elevada escalinata de entrada que culmina na sedente figura feminina da alma máter, emblema da Universidade. Entre a súa oferta académica destacamos aquí a presenza da Cátedra de Cultura Galega “Xosé Neira Vilas”, desde 1992, que promove docencia de lingua, literatura e cultura galega como materias electivas e optativas.