Casa do Señorón
Edificio singularAno de construción: Década de
1930
Promotor: José García Rodríguez, alcumado O Señorón,
emigrou á Arxentina xunto co seu irmán. Cando regresa decide facer en Ourol
unha casa similar á que xa posuía no país suramericano. A construción do
inmoble corre a cargo de Trasancos de Merille, quen ao parecer a executou a
partir dunha fotografía. O seu irmán tamén construirá a súa vivenda moi preto
desta.
Estilo arquitectónico: Eclecticismo en clave pintoresca
Características:
Esta casa tamén é
coñecida como a Casa das Palmeiras, xa que estas se alzan como elementos
fundamentais da composición.
Trátase dun edifico
de planta rectangular con dous pisos de altura e unha baixocuberta. A esta
sinxela composición engadiuse un corpo frontal que alberga a entrada principal
do inmoble. Destacan os elementos orientalistas que se perciben na cuberta
deste corpo, formada por tres faldróns, un deles centrado e dende o cal se verten
as augas á fachada principal. Tamén sobresae o trazado dos seus beirados, que
lembran o teitume dun pagode.
A vivenda constitúe
un dos mellores exemplos de arquitectura residencial indiana do municipio de
Ourol. O edificio álzase sobre un pedestal e accédese a el a través dunha grande
escalinata flanqueada por dous xardíns que albergan dúas palmeiras, cuxo orixe
se remonta á época de construción da vivenda e cuxas sementes se trouxeron
expresamente de Cuba. A propiedade está rodeada por un muro que se catalogou no
seu momento como un dos máis bonitos da zona debido ás flores coloreadas das
enredadeiras que colgaban sobre a pedra.
Fontes:
Bores Gamundi, Fernando (coord.) (2000): Casas de indianos, Santiago de
Compostela, Secretaría Xeral para as Relacións coas Comunidades Galegas, Xunta
de Galicia.
Prieto Prieto, Verónica (2011): Ourol. A nosa historia, Ourol, Concello
de Ourol.
Prieto Prieto, Verónica (2015): Ourol. Anacos da nosa historia,
Ourol, Concello de Ourol.
