Ribadeo é unha das vilas galegas onde o legado dos indianos -os emigrantes retornados da América ao longo do século XIX e XX- permanece aínda ben visible. Tanto no casco urbano coma no resto do concello, podemos atopar numerosos exemplos de casas de arquitectura indiana, canda outros edificios vinculados á sua actividade, como as escolas fundadas e financiadas polos emigrantes galegos en América. 

O Consello da Cultura Galega colabora de maneira habitual coa festa de celebración histórica "Ribadeo Indiano", que todos os veráns recrea o ambiente e a sociedade de primeiros do século XX. Este roteiro, que se irá actualizando e enriquecendo con máis contidos e localizacións, é un convite a explorar a vila e o municipio para descubrir un patrimonio singular que aínda non foi esquecido.